ສະຫະພັນແມ່ຍິງກົມ ວສ-ປສ ການທະຫານ ເປິດຂະບວນການ 3 ດີ ແລະ
ປາຖະກະຖາວັນແມ່ຍິງສາກົນ ຄົບຮອບ 107 ປີ
ພັນເອກ ສຸລິວັນ ແສງຈັນ ເປັນປະທານກອງປະຊຸມເປິດຂະບວນການ 3 ດີແລະປາຖະກະຖາ
ວັນແມ່ຍິງສາກົນ ຄົບຮອບ 107 ປີ ຂອງສະຫະພັນແມ່ຍິງກົມ ວິທະຍາສາດ-ປະຫວັດສາດ ການທະຫານ
ຕອນເຊົ້າຂອງວັນທີ 7 ມີນາ 2017 ນີ້, ຢູ່ກົມ ວິທະຍາສາດ-ປະຫວັດສາດ ການທະຫານ ກະຊວງປ້ອງກັນປະເທດ ໄດ້ຈັດກອງປະຊຸມເພື່ອເຊື່ອມຊຶມ
ມະຕິກອງປະຊຸມຄົບຄະນະບໍລິຫານງານຂອງສູນກາງສະຫະພັນແມ່ຍິງລາວ ຄັ້ງທີ 2 ສະໄໝທີ VII ແລະເອກະສານກ່ຽວກັບເນື້ອໃນຂໍ້ແຂ່ງຂັນ 3 ດີ ພ້ອມ
ທັງເຫຼົ່າມູນເຊື້ອວັນທີ 8 ມີນາ ວັນແມ່ຍິງສາກົນຄົບຮອບ 107 ປີ ໂດຍພາຍໃຕ້ການເປັນປະທານຂອງ ສະຫາຍ ພັນເອກ ສຸລິວັນ ແສງຈັນ ຮອງຫົວໜ້າ
ກົມ ວິທະຍາສາດ-ປະຫວັດສາດ ການທະຫານ, ມີສະຫາຍ ພັນໂທນາງ ຄຳພູ ສິດທິເສນ ຫົວໜ້າຫ້ອງການສະຫະພັນແມ່ຍິງ ກົມໃຫຍ່ການເມືອງກອງທັບ,
ມີຜູ້ຕາງໜ້າຈາກ 8 ພະແນກການ ຕະຫຼອດຮອດສະມາຊິກສະຫະພັນແມ່ຍິງພາຍໃນກົມເຂົ້າຮວ່ມ 60 ກວ່າສະຫາຍ.
ພັນໂທ ນາງຄຳພູ ສິດທິເສນ ປາຖະກະຖາວັນແມ່ຍິງສາກົນຄົບຮອບ 107 ປີ
ໂອກາດນີ້, ສະຫາຍ ພັນໂທ ນາງ ຄຳພູ ສິດທິເສນ ກໍ່ໄດ້ສັງລວມບັນດາເອກະສານທີ່ສຳຄັນເປັນຕົ້ນແມ່ນມະຕິຂອງກອງປະຊຸມຄົບຄະນະບໍລິຫານງານ
ສູນກາງສະຫະພັນແມ່ຍິງລາວ ຄັ້ງທີ 2 ສະໄໝທີ VII ແລະເອກະສານເນື້ອໃນຂໍ້ແຂ່ງຂັນ 3 ດີ ເປັນຕົ້ນແມ່ນພົນລະເມືອງດີ, ພັດທະນາດີ , ສ້າງຄອບຄົວດີ
ພ້ອມນີ້ຍັງໄດ້ເຫຼົ່າມູນເຊື້ອປະຫວັດຄວາມເປັນມາຂອງວັນແມ່ຍິງສາກົນວັນທີ 8 ມີນາ 1910-8 ມີນາ 2017 ໃນໂອກາດຄົບຮອບ 107 ປີ.
ຈຸດປະສົງຂອງການເຊື່ອມຊຶມເອກະສານຄັ້ງນີ້ແມ່ນເພື່ອແນໃສ່ເຮັດໃຫ້ສະຫາຍສະມາຊິກພາຍໃນໜວ່ຍຂອງຕົນ ໄດ້ຮັບຮູ້ເຊື່ອມຊຶມກຳແໜ້ນທິດທາງ
ແຜນການເອກະສານຂອງຂັ້ນເທິງ ນຳມາຈັດຕັ້ງຜັນຂະຫຍາຍເຂົ້າໃນວຽກງານຕົວຈິງ ເພື່ອສ້າງໃຫ້ໜວ່ຍ ແລະສະມາຊິກພັກພາຍໃນໜ່ວຍໄດ້ຮັບການປະ
ຕິບັດ ໃຫ້ນັບມື້ນັບດີຂຶ້ນ.