ກົມວິທະຍາສາດ-ປະຫວັດສາດ ການທະຫານ ທົດລອງ
ການນຳໃຊ້ຜະລິດຕະພັນຈາກການຄົ້ນຄວ້າ
ໃນວັນທີ 28 ກຸມພາ 2023 ນີ້, ກົມວິທະຍາສາດ-ປະຫວັດສາດການທະຫານ ໄດ້ຈັດພິທີປິດໂຄງການ ແລະ ທົດລອງການນຳໃຊ້ຜະລິດຕະພັນ
ຈາກການຄົ້ນຄວ້າໂດຍການເປັນປະທານຂອງ ສະຫາຍ ພົນໂທ ທອງລອຍ ສິລິວົງ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ການ
ເມືອງກອງທັບ, ປະທານສະພາວິທະຍາສາດການທະຫານກະຊວງປ້ອງກັນປະເທດ, ມີຄະນະກົມ, ແຂກທີ່ຖືກເຊີນພ້ອມດ້ວຍພະນັກງານວິຊາການກົມວິທະຍາ
ສາດ-ປະຫວັດສາດ ການທະຫານເຂົ້າຮ່ວມ.
ສະຫາຍ ພົນຈັດຕະວາ ວຽງໄຊ ສົມວິຈິດ ຫົວໜ້າກົມວິທະຍາສາດ-ປະຫວັດສາດການທະ ຫານໄດ້ຜ່ານແຜນການຈັດຕັ້ງການປະຕິບັດໃນ 2 ໂຄງການ ຄື: ໂຄງການຄົ້ນຄວ້າອອກແບບລູກປືນໃຫຍ່ໜ້າດິນ ສຳລັບການຮຽນ - ການສອນ ແລະ ຫັດແອບ ແມ່ນໂຄງການທີ່ໄດ້ຮັບການອະນຸມັດ ຢ່າງເປັນທາງ ການ ຈາກທ່ານລັດຖະມົນຕີກະຊວງປ້ອງກັນປະເທດໂດຍມອບໃຫ້ ກົມວິທະຍາສາດ-ປະຫວັດ ສາດການທະຫານເປັນຜູ້ຮັບຜິດຊອບໂດຍກົງຮອບດ້ານ ເພື່ອຈັດຕັ້ງປະຕິບັດໃຫ້ເກີດໝາກຜົນ, ໂຄງການດັ່ງກ່າວແມ່ນຫົວຄິດປະດິດສ້າງແມ່ນຄວາມຮັບຜິດຊອບຂອງຄະນະພັກ-ຄະນະບັນຊາ ແລະ ພະນັກງານວິ ຊາການ ຂອງກົມວິທະຍາສາດ-ປະຫວັດສາດການທະຫານ, ໂຄງການນີ້ມີຈຸດປະສົງເພື່ອສ້າງອຸປະກອນຈຳລອງໃຫ້ແກ່ການຍິງລູກປືນໃຫຍ່ໜ້າດິນໃນທຸກ ຮູບແບບເພື່ອຈຳລອງການຫັດແອບຢ່າງຄົບຊຸດຂອງຍຸດທະວິທີ ແລະ ບັນດາທ່າຈັງຫວະ ຂັ້ນຕອນຂອງການຍິງລູກປືນໃຫຍ່ເຮັດໃຫ້ການຫັດແອບມີຄວາມ ຄ້າຍຄຽງກັບການຍິງປືນໃຫຍ່ແທ້ ເຊິ່ງຜະລິດຕະພັນຄົ້ນຄວ້ານີ້ຈະມຸ່ງເນັ້ນໃສ່ການຫັດແອບໃຫ້ມີຄວາມປະຫຍັດ, ປະຕິບັດການຫັດແອບໄດ້ຫຼາຍຄັ້ງຕໍ່ ເນື່ອງ, ສະດວກໃນການຊອກພື້ນທີ່ເພື່ອຫັດແອບ ແລະ ຮັບປະກັນໃຫ້ມີຄວາມປອດໄພສູງ, ສ່ວນໂຄງການຄົ້ນຄວ້າອອກແບບເສື້ອເກາະກັນລູກກະສຸນ ກໍ່ແມ່ນໂຄງການໜຶ່ງທີ່ໄດ້ຮັບການອະນຸມັດຈາກຂັ້ນເທິງ ຈຸດປະສົງຂອງໂຄງການນີ້ແມ່ນການດຳເນີນການຄົ້ນຄວ້າອອກແບບຊອກຫາບັນດາວັດຖຸເພື່ອ ໃຫ້ມີທ່າແຮງໃນການຜະລິດເສື້ອເກາະກັນລູກກະສຸນດ້ວຍຕົນເອງ ຕອບສະໜອງໃຫ້ແກ່ກຳລັງສູ້ຮົບ ແລະ ກຳລັງປ້ອງກັນຄວາມສະຫງົບໃນການປະຕິບັດ ໜ້າທີ່, ໂຄງການນີ້ເປັນການຄົ້ນຄວ້າໃນຂັ້ນຕົ້ນເຊິ່ງມີເປົ້າໝາຍຄົ້ນຄວ້າອອກແບບເສື້ອເກາະໃນ 2 ປະເພດຄື: ປະເພດທີ່ນຳໃຊ້ປ້ອງກັນລູກກະສຸນຂະໜາດ 7,62x 39 ມມ ເຊິ່ງເປັນປະເພດປືນ AK, M16, ປະເພດທີ 2 ເປັນການອອກແບບສຳລັບປ້ອງກັນລູກກະສຸນປະເພດປືນສັ້ນຂະໜາດ 9x18 ມມ ເຊິ່ງເປັນປືນ ປະເພດ K59 ເຊິ່ງຜົນຂອງການຄົ້ນຄວ້າໂຄງການນີ້ ໄດ້ເຮັດໃຫ້ໃຫ້ມີທ່າແຮງໃນການຜະລິດເສື້ອເກາະກັນລູກກະສຸນທັງ 2 ປະເພດທີ່ມີມູນ ຄ່າທີ່ບໍ່ສູງ ແລະ ສາມາດ ຜະລິດເປັນຈຳນວນຫຼາຍຕາມຄວາມຕ້ອງການໄດ້. ຜ່ານການຈັດຕັ້ງປະຕິບັດ 2 ໂຄງການດັ່ງກ່າວໄດ້ມີຜົນສຳເລັດເປັນຢ່າງດີ ຍ້ອນວ່າໄດ້ຮັບຄວາມເອົາໃຈໃສ່ຢ່າງໃກ້ຊິດຕິດແທດ, ໄດ້ຮັບຄວາມຮ່ວມມື, ສະໜັບສະໜູນ ແລະ ຊ່ວຍເຫຼືອຈາກບັນດາກົມກອງທີ່ກ່ຽວຂ້ອງໂດຍສະ ເພາະຄະນະພັກ-ຄະນະບັນຊາກົມປືນໃຫຍ່ໜ້າດິນ ກົມໃຫຍ່ເສນາທິການກອງທັບທີ່ໃຫ້ຄວາມຮ່ວມມືຕອບສະໜອງບັນດາຂໍ້ມູນທີ່ຈຳເປັນ ແລະ ຍັງໄດ້ແຕ່ງ ຕັ້ງພະນັກງານ ວິຊາການທີ່ມີຄວາມຮູ້ມີປະສົບການມາເຂົ້າຮ່ວມໃນການຄົ້ນຄວ້າ.
ໂອກາດດຽວກັນນີ້, ສະຫາຍ ພົນໂທ ທອງລອຍ ສິລິວົງ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ຄວາມສຳເລັດທີ່ກົມວິທະຍາສາດ-ປະຫວັດ
ສາດ ການທະຫານທີ່ຍາດມາໄດ້ໃນການຈັດ ຕັ້ງປະຕິບັດ 2 ໂຄງການດັ່ງກ່າວ ພ້ອມນີ້ ກໍຮຽກຮ້ອງໃຫ້ພະນັກງານ-ວິຊາການຈົ່ງສືບຕໍ່ເອົາໃຈໃສ່ຕໍ່ວິຊາສະ
ເພາະຂອງຕົນເພື່ອພ້ອມກັນພັດທະນາປັບປຸງ, ພາຫະນະເຕັກນິກການທະຫານ,ອາວຸດໃຫ້ມີຄວາມທັນສະໄໝ,ທົນທານ,ນຳໃຊ້ໄດ້ຍາວນານ ເພື່ອຫຼຸດຜ່ອນ
ການຈັດຊື້ຈາກຕ່າງປະເທດ.
ແຫຼ່ງທີ່ມາ:ສົມຄິດ ພູມມີຈິດ
ວັນທີ 02/03/2023