ຫ້ອງການສະຫະພັນແມ່ຍິງກອງທັບ ສະຫຼຸບຖອດຖອນບົດຮຽນ
ການຈັດຕັ້ງປະຕິບັດຂໍ້ແຂ່ງຂັນ 3 ດີ
ຫ້ອງການສະຫະພັນແມ່ຍິງກອງທັບ ໄດ້ຈັດຕັ້ງສະຫຼຸບຖອດຖອນບົດຮຽນ ການຈັດຕັ້ງປະຕິບັດຂະບວນການຂໍ້ແຂ່ງຂັນ 3 ດີ ໄລຍະທີ I (2021-2022)
ແລະ ທິດທາງແຜນການໃນໄລຍະທີ II (2023-2024) ໃນວັນທີ 3 ມີນາ 2023 ນີ້, ໂດຍການເປັນປະທານຂອງ ສະຫາຍ ພົນຕີ ວໍລະສານ ວິລັດດາວົງ
ຮອງຫົວໜ້າກົມໃຫຍ່ການເມືອງກອງທັບ ຜູ້ຊີ້ນຳອົງການຈັດຕັ້ງມະຫາຊົນ, ມີຄະນະຫ້ອງ ການສະຫະພັນແມ່ຍິງກອງທັບ, ບັນດາພະແນກ, ຂະແໜງ ແລະ
ໜ່ວຍເອກະລາດ ກົມກອງກຳລັງຫຼວງເຂົ້າຮ່ວມ.
ສະຫາຍ ພັນເອກ ນາງ ໄພວອນ ອິນທະບຸດ ຫົວໜ້າຫ້ອງການສະຫະພັນແມ່ຍິງກອງທັບ ໄດ້ສະຫຼຸບຕີລາຄາຄືນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີໃນໄລຍະຜ່ານມາ, ເຊິ່ງຄະນະນຳແມ່ຍິງແຕ່ລະຂັ້ນ ໄດ້ເປັນເຈົ້າການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ VIII ຕິດພັນກັບການປະຕິບັດ 4 ໜ້າທີ່ໃຫຍ່ 26 ແຜນງານທີ່ຄະນະພັກກະຊວງປ້ອງກັນປະເທດວາງອອກ. ໃນນີ້, ຄະນະນຳແມ່ຍິງແຕ່ລະຂັ້ນ ໄດ້ເອົາໃຈໃສ່ຈັດ ຕັ້ງຜັນຂະຫຍາຍເນື້ອໃນດັ່ງກ່າວແທດເໝາະກັບວຽກງານຕົວຈິງ. ໄປພ້ອມກັນນັ້ນ, ຍັງໄດ້ລົງຊຸກຍູ້, ຕິດຕາມ, ກວດກາ, ປະເມີນຜົນໄດ້ຮັບໃນແຕ່ລະໄລ ຍະ, ພ້ອມທັງສັງເກດຕີລາຄາແຜນການຢັ້ງຢືນໃນການຈັດຕັ້ງປະຕິບັດໃຫ້ຖືກຕ້ອງສອດຄ່ອງຕາມແຜນການນຳພາ ຂອງຄະນະນຳແມ່ຍິງແຕ່ລະຂັ້ນ ໃຫ້ໜັກ ແໜ້ນເຂັ້ມແຂງ, ສົມທົບກັບການແລກປ່ຽນຄຳຄິດເຫັນ ເພື່ອຂໍທິດຊີ້ນຳຈາກຄະນະພັກ-ຄະນະບັນຊາແຕ່ລະຂັ້ນ ເພື່ອເປັນທິດທາງໃນການຈັດຕັ້ງປະຕິບັດ ຂະບວນການດັ່ງກ່າວໃຫ້ໄດ້ຮັບໝາກຜົນສູງ, ຜ່ານການຈັດຕັ້ງປະຕິບັດຕົວຈິງ ສາມາດຕີລາຄາ ແລະ ຮັບຮອງເອົາໄດ້ສະມາຊິກແມ່ຍິງ 3 ດີປະເພດ I ກວມເອົາ 84,49%, ປະເພດ II ກວມເອົາ 12,92%, ເປັນພົນລະເມືອງດີ ກວມເອົາ 99,32%, ພັດທະນາດີກວມເອົາ 89,68%, ຄອບຄົວດີກວມເອົາ 72,69%, ບຸກຄົນຕົວແບບ 675 ສະຫາຍ, ຄອບຄົວຕົວແບບ 438 ຄອບຄົວ, ພະແນກ, ຂະແໜງ ແລະ ໜ່ວຍ 3 ດີ 660 ໜ່ວຍ, ດ້ານການເຄື່ອນໄຫວວຽກງານກອງທຶນ, ປັດຈຸບັນການຈັດຕັ້ງເຄື່ອນໄຫວກອງທຶນ ສະຫະພັນແມ່ຍິງກອງທັບແມ່ນມີ 2 ຮູບແບບຄື: ກອງທຶນພັດທະນາ ແລະ ກອງທຶນຊ່ວຍເຫຼືອເຊິ່ງກັນ ແລະ ກັນ ຈັດຕັ້ງຢູ່ 35 ກົມກອງໃນກຳລັງຫຼວງ. ໃນນັ້ນ, ກອງທຶນພັດທະນາມີ 105 ກຸ່ມກອງທຶນ, ມີສະມາຊິກທັງໝົດ 21.907 ສະຫາຍ, ມີເງິນທ້ອນທັງໝົດ 66.126 ລ້ານກວ່າກີບ, ໄດ້ຮັບດອກເບ້ຍຈາກການປ່ອຍກູ້ທັງໝົດ 8.285 ລ້ານກວ່າກີບ ແລະ ກອງທຶນຊ່ວຍເຫຼືອເຊິ່ງກັນ ແລະ ກັນມີ 13 ກຸ່ມກອງທຶນ, ມີສະມາຊິກ ທັງໝົດ 678 ສະຫາຍ, ມີເງິນທ້ອນທັງໝົດ 358 ລ້ານກວ່າກີບ. ພ້ອມກັນນີ້ ກໍໄດ້ພ້ອມກັນຮັບຮອງເອົາທິດທາງແຜນການພັດທະນາກອງທຶນໃນປີຕໍ່ໄປອີກດ້ວຍ.
ສະຫາຍ ພົນຕີ ວໍລະສານ ວິລັດດາວົງ ໄດ້ມີຄຳເຫັນໂອ້ລົມ, ພ້ອມທັງເນັ້ນໜັກໃຫ້ຄະນະນຳແມ່ຍິງແຕ່ລະຂັ້ນ, ສືບຕໍ່ເຮັດວຽກງານສຶກສາອົບຮົມການ
ເມືອງນຳພາແນວຄິດ ໃຫ້ເອື້ອຍນ້ອງແມ່ຍິງໃນທົ່ວກອງທັບຢ່າງເລິກເຊິ່ງ, ເພີ່ມທະວີຄວາມຮັບຜິດຊອບທາງດ້ານການເມືອງໃຫ້ສູງບົນພື້ນຖານແນວທາງ
ນະໂຍບາຍ, ມະຕິຄຳສັ່ງຕ່າງໆຂອງພັກ, ກົດໝາຍຂອງລັດ, ປັບປຸງແບບແຜນວິທີເຮັດວຽກ ແລະ ພັດທະນາອົງການຈັດຕັ້ງສະຫະພັນແມ່ຍິງແຕ່ລະຂັ້ນ ໃຫ້
ມີຄວາມໜັກແໜ້ນເຂັ້ມແຂງໃນທຸກດ້ານ, ເປັນເຈົ້າການເຕົ້າໂຮມຄວາມສາມັກຄີພາຍໃນໃຫ້ເປັນປຶກແຜນແໜ້ນໜາ, ເອົາໃຈໃສ່ຍົກລະດັບຄວາມຮູ້
ຄວາມສາມາດດ້ານຕ່າງໆ ພາຍໃນຖັນແຖວເອື້ອຍນ້ອງແມ່ຍິງໃນກອງທັບໃຫ້ນັບມື້ສູງຂຶ້ນ, ບັນຫາສຳຄັນພ້ອມກັນນຳເອົາເນື້ອໃນຈິດໃຈ ແລະ ຜົນສຳເລັດ
ກອງປະຊຸມໃນຄັ້ງນີ້ ໄປຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງຂອງແຕ່ລະກົມກອງໃຫ້ມີບາດກ້າວຫັນປ່ຽນອັນໃໝ່.
ແຫຼ່ງທີ່ມາ:ນາງ ນາລີ
ວັນທີ 06/03/2023