ງານມະຫະກຳກິລາແຫ່ງຊາດ ຄັ້ງທີ XI ຫຼື ຊຽງຂວາງ ເກມ ໄຂຂຶ້ນຢ່າງຍິ່ງໃຫຍ່
ງານມະຫະກຳກິລາແຫ່ງຊາດ ຄັ້ງທີ XI ຫຼື ຊຽງຂວາງ ເກມ ໄດ້ໄຂຂຶ້ນຢ່າງເປັນທາງການ ໃນວັນທີ 13 ທັນວາ 2022 ນີ້,
ຢູ່ທີ່ສະໝາມກິລາທົ່ງໄຫຫີນ
ຊຽງຂວາງ, ໂດຍການເປັນກຽດເຂົ້າຮ່ວມຂອງ ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ
ລາວ, ມີ ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ, ທ່ານ ບຸນຈັນ ສີວົງພັນ ກຳມະການສູນກາງພັກ ເຈົ້າແຂວງ
ແຂວງຊຽງ
ຂວາງ ພ້ອມດ້ວຍການນຳ ພັກ-ລັດ, ແຂກທັງພາຍໃນ ແລະ ຕ່າງປະເທດ, ຄະນະນຳ, ຄູເຝິກ ແລະ ນັກກິລາຈາກ 17 ແຂວງ, 1 ນະຄອນຫຼວງ, 4 ກະຊວງ
ແລະ ມວນຊົນເຂົ້າຮ່ວມຢ່າງຫຼວງຫຼາຍ.
ໃນພິທີໄຂງານມະຫະກຳກິລາແຫ່ງຊາດ ຄັ້ງທີ XI ຫຼື ຊຽງຂວາງ ເກມ ຄັ້ງນີ້, ໄດ້ມີການສະແດງສິລະປະດົນຕີ ແລະ ການໂດດຈ້ອງ, ຈາກນັ້ນ ທ່ານ ບຸນຈັນ ສີວົງພັນ ເຈົ້າແຂວງ ແຂວງຊຽງຂວາງ ໄດ້ລາຍງານວ່າ: ງານມະຫະກຳກິລາແຫ່ງຊາດ ແມ່ນການແຂ່ງຂັນກິລາຫຼາຍປະເພດຮ່ວມກັນ ປະກອບມີ: ໝວດກິລາສາກົນ ແລະ ກິລາພື້ນເມືອງ ຊຶ່ງຕາມກຳນົດໄດ້ຈັດຂຶ້ນທຸກໆ 3 ປີ ໂດຍຄັດເລືອກແຂວງຜັດປ່ຽນກັນເປັນເຈົ້າພາບ ເພື່ອຊຸກຍູ້ຂະບວນການກິ ລາກາຍະກຳຢູ່ພາຍໃນປະເທດ ທັງເປັນການປຸກ ລະດົມສົ່ງເສີມມະຫາຊົນເຂົ້າຮ່ວມຢ່າງກວ້າງຂວາງ ແນໃສ່ເສີມສ້າງສຸຂະພາບ, ມິດຕະພາບ, ການພັດທະ ນາ, ການຮ່ວມມື ແລະ ຄວາມສາມັກຄີເປັນປຶກແຜ່ນຂອງປວງຊົນລາວທັງຊາດ ທັງເປັນການພັດທະນາຊັບພະຍາກອນມະນຸດຂອງຊາດ, ເປັນການປຸກລະ ດົມຊາວໜຸ່ມ, ເຍົາວະຊົນ, ນັກຮຽນ-ນັກສຶກສາໃຫ້ມີສ່ວນຮ່ວມໃນຂະບວນການຫຼີ້ນກິລາ ແລະ ແຂ່ງຂັນກິລາປະເພດຕ່າງໆ ເພື່ອຫ່າງໄກສິ່ງເສບຕິດ ແລະ ປາກົດການຫຍໍ້ທໍ້ຕ່າງໆ ທັງເປັນການເຝິກຝົນຮ່າງກາຍ ແລະ ຈິດໃຈເບີກບານເຂັ້ມແຂງ, ກຽມພ້ອມສືບທອດມູນເຊື້ອພາລະກິດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ.
ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໄດ້ກ່າວເປີດງານມະຫະກຳກິລາແຫ່ງຊາດ ຄັ້ງທີ XI ຢ່າງເປັນທາງການ ໂດຍໄດ້ສະແດງ ຄວາມຊົມເຊີຍຕໍ່ການຫ້າງຫາກະກຽມຄວາມພ້ອມທຸກໆດ້ານຂອງເຈົ້າພາບ ແລະ ຄະນະຮັບຜິດຊອບ, ຊົມເຊີຍທຸກພາກສ່ວນທີ່ສົ່ງນັກກິລາເຂົ້າຮ່ວມແຂ່ງ ຂັນຢ່າງຕັ້ງໜ້າ ແລະ ມີຄວາມຮັບຜິດຊອບສູງ ພ້ອມທັງເຊື່ອໝັ້ນວ່າງານມະຫະກຳກິລາແຫ່ງຊາດຄັ້ງນີ້ເປັນການເສີມຂະຫຍາຍຄວາມສາມັກຄີ ແລະ ຄວາມ ເປັນປຶກແຜ່ນແໜ້ນໜາຂອງປວງຊົນລາວທັງຊາດ. ຈາກນັ້ນ, ໄດ້ມີພິທີສວນສະໜາມຈາກ 32 ກ້ອນກຳລັງຮ່ວມສວນສະໜາມເຊັ່ນ: ກ້ອນກອງດຸລິຍາງ, ກ້ອນປ້າຍຄຳຂວັນມະຫະກຳກິລາແຫ່ງຊາດ, ກ້ອນສັນຍາລັກມະຫະກຳກິລາແຫ່ງຊາດ ຄັ້ງທີ XI, ກ້ອນທຸງຊາດ-ທຸງກິລາ ເຊີນຂຶ້ນສູ່ຍອດເສົາ, ກ້ອນກຳມະ ການຕັດສິນ, ກ້ອນກຳລັງນັກກິລາ 17 ແຂວງ, 1 ນະຄອນຫຼວງ, 4 ກະຊວງ ແລະ ມີການສະແດງສິລະປະ, ຟ້ອນລຳ, ຮ້ອງເພງ ທີ່ມີແສງ, ສີ, ສຽງ ຍິ່ງໃຫຍ່ ງົດງາມ ຜ່ານ 5 ລາຍການຄື: ລາຍການຍິນດີຕ້ອນຮັບສູ່ຊຽງຂວາງເກມ, ລາຍການຮ້ອງ ເພງໝູ່ຍິງ-ຊາຍ ທີ່ມີຊື່ວ່າ: ໄຊຊະນະຊຽງຂວາງ, ຫວນຄືນເມືອງ ຊຽງ ແລະ ຊຽງຂວາງເກມ, ລາຍການ ສະແດງມວຍລາຍລາວ, ລາຍການສະແດງທີ່ມີຊື່ວ່າ: ແອ່ນນ້ອຍລອຍລົມ ແລະ ລາຍການສະແດງມ່ວນຊື່ນງານມະ ຫະກຳກິລາແຫ່ງຊາດ ທີ່ສ່ອງແສງເຖິງວັດທະນະທຳຮີດຄອງປະເພນີຂອງຊາວແຂວງຊຽງຂວາງ ກໍຄືວັດທະນະທຳຮີດຄອງປະເພນີຊອງຊາດເຮົາ ລວມໄປເຖິງ ການເຕົ້າໂຮມຄວາມສາມັກຄີໃນທົ່ວປວງຊົນ ຜ່ານຂະບວນການຫຼິ້ນກິລາຢ່າງຟົດຟື້ນມ່ວນຊື່ນ. ງານມະຫະກຳກິລາແຫ່ງຊາດ ຄັ້ງທີ XI ນີ້ ແຂ່ງຂັນທັງໝົດ 25 ປະເພດກິລາຄື: ຍິງປືນ, ລອຍນ້ຳ, ບານບ້ວງ, ເທຄວັນໂດ, ໝາກແລ້, ຍິງທະນູ, ໜ້າເກັກ, ແລ່ນ-ລານ, ມວຍສາກົນ, ໝາກເສິກ, ປັນຈັກສີລັດ, ມວຍ ປ້ຳ, ຄາຣາເຕໂດ, ກະຕໍ້-ຊິນລອນ, ບານເຕະ, ໝາກຂ່າງ, ເປຕັງ, ກ໊ອຟ, ດອກປີກໄກ່, ເທັນນິສ, ລົດຖີບ, ປິ່ງປ໋ອງ, ມວຍລາວ, ຢູໂດ ແລະ ວູຊູ. ມີນັກກິລາ 3.093 ຄົນຈາກ 17 ແຂວງ, 1 ນະຄອນຫຼວງ ແລະ 4 ກະຊວງ ເປັນຕົ້ນ ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ກະຊວງພະລັງງານ ແລະ ບໍ່ແຮ່ ແລະ ກະ ຊວງສາທາລະນະສຸກ ເຂົ້າຮ່ວມຊິງຫຼຽນທັງໝົດ 2.598 ຫຼຽນ. ສຳລັບບາງປະເພດກິລາໄດ້ແຂ່ງຂັນມາແຕ່ວັນທີ 14 ພະຈິກ 2022 ຢູ່ນະຄອນຫຼວງວຽງຈັນ ຄື: ກິລາລອຍນ້ຳ ແລະ ກິລາຍິງປືນ, ສ່ວນຢູ່ແຂວງຊຽງຂວາງ ເລີ່ມມາແຕ່ວັນທີ 1 ທັນວາ 2022 ແລະ ມາຮອດວັນທີ 13 ທັນ ວາ 2022 ມີ 11 ປະເພດກິລາແຂ່ງຂັນສຳເລັດແລ້ວຄື: ກິລາລອຍນ້ຳ, ແລ່ນ-ລານ, ເທຄວັນໂດ, ມວຍປ້ຳ, ຍິງທະນູ-ຍິງໜ້າເກັກ, ຄາຣາເຕໂດ, ໝາກ ເສິກ, ບານບ້ວງ, ປັນຈັກສີລັດ, ມວຍສາກົນ ແລະ ໝາກແລ້ ແລະ ຈະດຳເນີນໄປຈົນຮອດ ວັນທີ 22 ທັນວາ 2022 ຈິ່ງຈະສຳເລັດ. ຈາກນັ້ນ, ບັນດາ ການນຳພັກ-ລັດ ແລະ ມວນຊົນ ທັງພາຍໃນ ແລະ ຕ່າງປະເທດ ຍັງໄດ້ຮັບຊົມການຈູດບັ້ງໄຟດອກຂຶ້ນສູ່ທ້ອງຟ້າທີ່ມີແສງແຕກກະຈາຍຫຼາກຫຼາຍສີສັນມີ ຄວາມຍິ່ງໃຫຍ່ງົດງາມ ສະແດງໃຫ້ເຫັນເຖິງງານມະຫະກຳກິລາແຫ່ງຊາດ ຊຽງຂວາງ ເກມ ຄັ້ງທີ XI ໄດ້ເປີດຂຶ້ນຢ່າງເປັນທາງການ ເຮັດໃຫ້ບັນຍາກາດ ມວນຊົນທີ່ເຂົ້າຮັບຊົມທັງໃນສະໜາມ ແລະ ນອກສະໜາມມີຄວາມຟົດຟື້ນ ແລະ ປະທັບໃຈ.
ແຫຼ່ງທີ່ມາ: ໜັງສືພິມກອງທັບ
ວັນທີ 14/12/2022