ຫົວໜ້າກົມໃຫຍ່ເສນາທິການກອງທັບ ໂອ້ລົມນັກກິລາກ໊ອບ ທີ່ເຂົ້າຮ່ວມແຂ່ງຂັນໃນງານມະຫະກຳກິລາແຫ່ງຊາດ ຄັ້ງທີ XI
ວັນທີ 9 ທັນວາ 2022 ນີ້, ສະຫາຍ ພົນໂທ ຄຳລຽງ ອຸທະໄກສອນ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບ
ໄດ້ພົບປະໂອ້ລົມກັບຄະນະຮັບຜິດຊອບ ແລະ ນັກກິລາກ໊ອບ (ກະຊວງປ້ອງກັນປະເທດ) ທີ່ກະກຽມເຂົ້າຮ່ວມແຂ່ງຂັນໃນງານມະຫະກຳກິລາແຫ່ງຊາດ ຄັ້ງທີ
XI ທີ່ ແຂວງຊຽງຂວາງເປັນເຈົ້າພາບ.
ສະຫາຍ ພົນຈັດຕະວາ ຄຳຄິດ ໄຊສົງຄາມ ປະທານບໍລິສັດເບສ ເທວເລຄອມ (best telecom) ຫົວໜ້າຄະນະຮັບຜິດຊອບຊີ້ນຳລວມນັກກິລາກ໊ອບ ໄດ້ລາຍງານຫຍໍ້ກ່ຽວກັບການຈັດຕັ້ງຫັດແອບເຝິກຊ້ອມຜ່ານມາ ເປັນຕົ້ນແມ່ນໄດ້ຮັບຄວາມເອົາໃຈໃສ່ຈາກການນຳຂັ້ນຕ່າງໆຂອງກະຊວງປ້ອງກັນປະເທດ, ຫົວໜ້າຄະນະຊີ້ນຳໄດ້ລົງໃກ້ຊິດຕິດແທດເປັນປົກກະຕິ ໄດ້ໃຫ້ການນຳພາຊີ້ນຳຢ່າງຮອບດ້ານ, ທຸ້ມເທສຸມເຫື່ອແຮງ, ດ້ານວັດຖຸເພື່ອປຸກລະດົມແນວຄິດຈິດ ໃຈອ້າຍນ້ອງນັກກິລາມີກຳລັງແຮງກາຍແຮງໃຈ, ບັນດານັກກິລາແຕ່ລະສະຫາຍແມ່ນໄດ້ມີຄວາມເອົາໃຈໃສ່ເຝິກຊ້ອມຫັດແອບປະຕິບັດແຜນການທຸກຢ່າງ ບາງສະຫາຍກໍມີສີມືມີປະສົບການສູງໃນການແຂ່ງຂັນ ສຳລັບການຈັດຕັ້ງເຝິກຊ້ອມ-ຫັດແອບແມ່ນໄດ້ມີຕາຕະລາງແຜນການຫັດແອບຢ່າງເປັນລະບົບຕາມ ເຕັກນິກ, ເປັນຕົ້ນແມ່ນການຫັດແອບສະໜາມຕົວຈິງ ເພື່ອໃຫ້ນັກກິລາມີຄວາມຊຳນິຊຳນານ ແລະ ເກັບກຳສະພາບຕົວຈິງໃນການເຝິກຊ້ອມ.
ໂອກາດນີ້ ສະຫາຍ ພົນໂທ ຄຳລຽງ ອຸທະໄກສອນ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດຊອບ ແລະ ນັກກິລາ ທີ່ໄດ້ເອົາໃຈໃສ່ໃນການປະ ຕິບັດຕາມແຜນການເຝິກຊ້ອມ-ຫັດແອບ, ພ້ອມທັງໂອ້ລົມຫຼາຍບັນຫາສຳຄັນ ແລະ ເນັ້ນໜັກໃຫ້ຄະນະຮັບຜິດຊອບ ແລະ ນັກກິລາ ຈົ່ງເອົາໃຈໃສ່ເປັນພິ ເສດເຮັດວຽກງານການເມືອງ-ນຳພາແນວຄິດເປັນປົກກະຕິ ປັບປຸງໃຫ້ມີຄວາມເຂັ້ມແຂງຄະນະຮັບຜິດຊອບຕ້ອງເອົາໃຈໃສ່ຖອດຖອນບົດຮຽນ, ເຕັກນິກ, ປະສົບການ ແລະ ນຳພານັກກິລາເຝິກຊ້ອມໃຫ້ເຫັນເຖິງບັນຫາທີ່ຍັງຄົງຄ້າງເພື່ອປັບປຸງແກ້ໄຂເຮັດໃຫ້ຄຸນນະພາບນັກກິລາສູງຂຶ້ນ ສຳລັບນັກກິລາຕ້ອງສຸມ ທຸກສະຕິປັນຍາ ແລະ ເຫື່ອແຮງເຂົ້າໃນການຫັດແອບຕາມແຜນການ ເພື່ອກະກຽມຄວາມພ້ອມທາງດ້ານສຸຂະພາບຮ່າງກາຍ ແລະ ຈິດໃຈ, ໃຫ້ມີເຕັກນິກ, ວິທະຍາສາດ, ມີຫົວຄິດປະດິດສ້າງ, ມີຄວາມສະຫງົບປອດໄພຈົນເຖິງເວລາເຂົ້າຮ່ວມການແຂ່ງຂັນ ແລະ ຕະຫຼອດໄລຍະຂອງການແຂ່ງຂັນເພື່ອຍາດເອົາໄຊ ຊະນະເປັນເຈົ້າຫຼຽນຄຳ ແລະ ເປັນເຈົ້າສະໜາມໃນທຸກລາຍການ.
ແຫຼ່ງທີ່ມາ: ເກດຕະວັນ
ວັນທີ 13/12/2022