ຄະນະຜູ້ແທນ ກົມໃຫຍ່ການເມືອງກອງທັບປະຊາຊົນຫວຽດນາມ
ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ
ໃນລະຫວ່າງວັນທີ 17-19 ພະຈິກ 2022 ນີ້, ຄະນະຜູ້ແທນກົມໃຫຍ່ການເມືອງກອງທັບປະ ຊາຊົນຫວຽດນາມ, ສະຫາຍ ພົນເອກ ເລືອງເກືອງ
ກຳມະ
ການກົມການເມືອງສູນກາງພັກກອມມູນິດຫວຽດນາມ, ຫົວໜ້າກົມໃຫຍ່ການເມືອງກອງທັບປະຊາຊົນຫວຽດນາມ ໄດ້ເດີນທາງມາຢ້ຽມຢາມ ແລະ
ເຮັດ
ວຽກຢູ່ ສປປ ລາວ ຢ່າງເປັນທາງການ ເຊິ່ງພິທີຕ້ອນຮັບທາງການໄດ້ຈັດຂຶ້ນໃນຕອນບ່າຍຂອງວັນທີ 17 ພະຈິກ 2022 ຢູ່ທີ່ກະຊວງປ້ອງກັນປະເທດ
ໂດຍ ການຕ້ອນຮັບຂອງ ສະຫາຍ ພົນໂທ ທອງລອຍ ສິລິວົງ ກຳມະການສູນກາງພັກ ຮອງລັດຖະມົນຕີ, ຫົວໜ້າກົມໃຫຍ່ການເມືອງກອງທັບ ພ້ອມດ້ວຍຄະນະ.
ພາຍຫຼັງສຳເລັດພິທິຕ້ອນຮັບຢ່າງເປັນທາງການ ທັງສອງຝ່າຍໄດ້ພົບປະແລກປ່ຽນສະພາບການວຽກງານດ້ານຕ່າງໆທີ່ໄດ້ຮ່ວມມືກັນຈັດຕັ້ງປະຕິບັດໃນ ໄລຍະຜ່ານມາ, ຄະນະປະຕິບັດງານພິເສດລັດຖະບານສອງປະເທດ ລາວ-ຫວຽດນາມ ໄດ້ຮັກສາການພົວພັນ, ພົບປະກັນເປັນປົກກະຕິສະເພາະໃນປີ 2021- 2022 ໄດ້ພ້ອມກັນຂຸດຄົ້ນອັດຖິທະຫານອາສາສະໝັກ ແລະ ຊ່ຽວຊານຫວຽດນາມທີ່ເສຍສະຫຼະຊີວິດໃນປາງສົງຄາມຢູ່ລາວ ໄດ້ຈຳນວນ 178 ອັດຖິ, ກະ ຊວງປ້ອງກັນປະເທດ ສສ ຫວຽດນາມ ຊ່ວຍສ້າງໂຮງຮຽນທິດສະດີການເມືອງກອງທັບສຳເລັດ ແລະ ໄດ້ເປີດນຳໃຊ້, ປັດຈຸບັນພວມດຳເນີນໂຄງການກໍ່ສ້າງ ໂຮງຮຽນວັດທະນະທຳຊົນເຜົ່າກອງທັບ, ສຳເລັດການກໍ່ສ້າງປັບປຸງຫໍພິພິທະພັນປະຫວັດສາດກອງທັບໃນໄລຍະທຳອິດ ແລະ ສົ່ງຄະນະວິຊາການມາຊ່ວຍ ອອກແບບຕົບແຕ່ງ, ຈັດວາງພາຍໃນ ແລະ ພາຍນອກ; ຄະນະວິຊາການຈາກຫໍສະໝຸດກອງທັບປະຊາຊົນຫວຽດນາມ ໄດ້ມາຊ່ວຍເຫຼືອດ້ານວິຊາການໃຫ້ ແກ່ຫໍສະໝຸດກອງທັບປະຊາຊົນລາວ; ວິຊາການຫວຽດນາມມາຊ່ວຍເຝິກອົບຮົມວຽກງານສືບສວນ-ສອບສວນຄະດີອາຍາ, ການປິ່ນປົວສຸຂະພາບ, ການ ພັກແລ້ງ, ການແລກປ່ຽນຄະນະຜູ້ແທນ. ແຕ່ລະໆດັບກໍໄດ້ປະຕິບັດຢ່າງເປັນປົກກະຕິຕາມອະນຸສັນຍາຂອງສອງຝ່າຍ. ພ້ອມທັງໄດ້ສະເໜີທິດທາງຮ່ວມມືໃນ ປີ 2023 ກ່ຽວກັບທິດທາງລວມ ບົນພື້ນຖານແມ່ນປະຕິປັດຕາມອະນຸສັນຍາ ລະຫວ່າງ ສອງກະຊວງປ້ອງກັນປະເທດ; ເພື່ອສືບຕໍ່ຮັກສາ ແລະ ເສີມຂະ ຫຍາຍມູນເຊື້ອຄວາມສາມັກຄີຂອງສອງຊາດ, ສະເພາະຢ່າງຍິ່ງສອງກົມໃຫຍ່ການເມືອງກອງທັບ ໃຫ້ນັບມື້ເຂົ້າສູ່ລວງເລິກ ຄື: ຮັກສາການແລກປ່ຽນຄະນະ ຜູ້ແທນໄປ-ມາຢ້ຽມຢາມຖອດຖອນບົດຮຽນຊຶ່ງກັນ ແລະ ກັນ ຕາມແຜນການຮ່ວມມືປະຈຳປີ 2022-2023; ກໍ່ສ້າງ-ບຳລຸງພະນັກງານໃຫ້ແກ່ກອງທັບປະ ຊາຊົນລາວ ແລະ ການກໍ່ສ້າງພະນັກງານດ້ານພາສາລາວໃຫ້ຫວຽດນາມ ຕາມອະນຸສັນຍາຂອງສອງກະຊວງປ້ອງກັນປະເທດລາວ ແລະ ຫວຽດນາມ; ເພີ່ມ ທະວີການໂຄສະນາແລກປ່ຽນວຽກງານຂ່າວສານ, ໜັງສືພິມ, ວິທະຍຸ, ໂທລະພາບ ແລະ ຮູບເງົາໃຫ້ກວ້າງຂວາງ ແລະ ທັນເວລາ; ສືບຕໍ່ຮ່ວມມືຊອກຄົ້ນ ອັດຖິທະຫານອາສາສະໝັກ ແລະ ຊ່ຽວຊານຫວຽດນາມທີ່ເສຍສະຫຼະຊີວິດໃນສະໄໝສົງຄາມຢູ່ລາວກັບຄືນສູ່ມາຕຸພູມ; ການປິ່ນປົວສຸຂະພາບໃຫ້ພະນັກ ງານ, ທະຫານລາວຢູ່ໂຮງໝໍຫວຽດນາມ ແລະ ຮັບປິ່ນປົວຊ່ຽວຊານການທະຫານ, ພະນັກງານ ແລະ ນັກຮົບຫວຽດນາມຢູ່ໂຮງໝໍລາວ ພ້ອມທັງສືບຕໍ່ແລກ ປ່ຽນການຢ້ຽມຢາມພັກແລ້ງ; ສະເໜີສືບຕໍ່ຊ່ວຍສ້າງໂຮງຮຽນວັດທະນະທຳຊົນເຜົ່າກອງທັບໃຫ້ສຳເລັດ ແລະ ຄາດກະຈະສຳເລັດໃນປີ 2023; ສະເໜີໃຫ້ ກົມໃຫຍ່ການເມືອງກອງທັບປະຊາຊົນຫວຽດນາມ ຊ່ວຍສືບຕໍ່ສ້ອມແປງ-ບູລະນະຫໍພິພິທະພັນປະຫວັດສາດກອງທັບປະຊາຊົນລາວ ໃຫ້ສາມາດເປີດນຳໃຊ້ ໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ທີ່ຈະມາເຖິງ; ສະເໜີຊ່ວຍເຫຼືອດ້ານວິຊາການໃຫ້ແກ່ຫໍສະໝຸດກອງທັບປະຊາຊົນລາວຕື່ມ ອີກ; ສະເໜີໃຫ້ມີການສືບຕໍ່ບຳລຸງໄລຍະສັ້ນໃຫ້ວິຊາການຝ່າຍລາວໃນຂົງເຂດວຽກງານພັກ-ວຽກງານການເມືອງ; ການເຄື່ອນໄຫວ-ພົບປະສອງຝ່າຍຄັ້ງທີ 2 ຢູ່ຊາຍແດນ ລາວ-ຫວຽດນາມ ແຂວງຫົວພັນ; ສຳຫຼວດສ້ອມແປງເສັ້ນທາງເລກ 9 ໂຮ່ຈີມິນ ທີ່ແຂວງສະຫວັນນະເຂດ ແລະ ການຊ່ວຍເຫຼືອປັບປຸງພື້ນຖານໂຄງລ່າງສູນເສຍອົງຄະ 12 ສູນຢູ່ 12 ແຂວງລາວ.
ໂອກາດນີ້, ສະຫາຍ ພົນເອກ ເລືອງເກືອງ ກໍໄດ້ຕີລາຄາສູງຕໍ່ການຕ້ອນຮັບອັນອົບອຸ່ນ ເພື່ອເປັນການເພີ່ມພູນຄູນສ້າງຄວາມສາມັກຄີແບບພິເສດ, ສະ ໜິດສະໜົມ ລະຫວ່າງປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ທັງເປັນການປະກອບສ່ວນເຂົ້າໃນການຮັດແໜ້ນສາຍພົວພັນຮ່ວມມືໃນ ທຸກຂົງເຂດວຽກງານໃຫ້ໄດ້ຮັບການພັດທະນາ ແລະ ສືບຕໍ່ໃຫ້ການສະໜັບສະໜູນຊ່ວຍເຫຼືອເຊິ່ງກັນ ແລະ ກັນຕະຫຼອດໄປ, ເປັນການເສີມຂະຫຍາຍສາຍ ພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ, ສອງກອງທັບ ແລະ ປະຊາຊົນສອງຊາດ, ຫວຽດນາມ -ລາວ-ລາວ-ຫວຽດນາມ ໃຫ້ໄດ້ຮັບການເສີມຂະຫຍາຍ ແລະ ແຕກດອກອອກຜົນຍິ່ງໆຂຶ້ນ. ໃນໂອກາດທີ່ມາຢ້ຽມຢາມ ສປປ ລາວ ຂອງຄະນະຜູ້ແທນດັ່ງ ກ່າວໃນຄັ້ງນີ້, ຍັງໄດ້ເຂົ້າວາງພວງມາລາຢູ່ອານຸສາວະລີນັກຮົບນິລະນາມ (ດາວແດງ) ເພື່ອເປັນການສະແດງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນ ຢ່າງລົ້ນເຫຼືອເຖິງຄຸນງາມຄວາມດີ, ນ້ຳໃຈຕໍ່ສູ້ຢ່າງພິລະອາດຫານ ແລະ ບໍ່ຍອມຈຳນົນຂອງບັນພະບູລຸດລາວ ກໍຄືບັນດານັກຮົບປະຕິວັດສອງຊາດ ລາວ- ຫວຽດນາມ, ທີ່ໄດ້ເສຍສະຫຼະຊີວິດ, ເລືອດເນື້ອເພື່ອພາລະກິດປະຕິວັດຕໍ່ສູ້ເພື່ອປະເທດຊາດ ຄະນະຜູ້ແທນດັ່ງກ່າວ ຍັງຈະໄດ້ເຄື່ອນໄຫວເຮັດວຽກຢູ່ແຂວງ ຫຼວງພະບາງ ແລະ ທ່ຽວຊົມສະຖານທີ່ທ່ອງທ່ຽວຂອງແຂວງຫຼວງພະບາງອີກຈຳນວນໜຶ່ງ.
ແຫຼ່ງທີ່ມາ: ນາງ ຈ່ອຍ ເພັດດາວອນ
ວັນທີ 18/11/2022