ພົນເອກ ຈັນສະໝອນ ຈັນຍາລາດ ຕ້ອນຮັບ ຫົວໜ້າວິທະຍາຄານເສນາທິການກອງທັບ ຣັດເຊຍ
ໃນວັນທີ 14 ທັນວາ 2022 ນີ້, ສະຫາຍ ພົນເອກ ຈັນສະໝອນ ຈັນຍາລາດ ຮອງລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ໄດ້ຕ້ອນຮັບ
ສະຫາຍ ພົນໂທ ວໍລາດີເມຍ ຊາຣຸດນິສະກີ ຫົວໜ້າວິທະຍາຄານເສນາທິການກອງທັບ ຣັດເຊຍ ພ້ອມດ້ວຍຄະນະ,
ເນື່ອງໃນໂອກາດທີ່ເດີນທາງມາຢ້ຽມ
ຢາມ ແລະ ເຮັດວຽກ ຢູ່ ສປປ ລາວ ໃນລະຫວ່າງວັນທີ 13-16 ທັນວາ 2022 ນີ້.
ສະຫາຍ ພົນເອກ ຈັນສະໝອນ ຈັນຍາລາດ ໄດ້ກ່າວສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ສາຍພົວພັນມິດຕະພາບ, ການຮ່ວມມືອັນເປັນ ມູນເຊື້ອທີ່ມີມາແຕ່ດົນນານ ແລະ ໄດ້ຮັບການສືບຕໍ່ເພີ່ມທະວີຮັດແໜ້ນການພົວພັນຮ່ວມມື ແລະ ເສີມຂະຫຍາຍສາຍພົວພັນມິດຕະພາບ ລະຫວ່າງ ສອງ ກອງທັບ ລາວ-ຣັດເຊຍ ໃຫ້ນັບມື້ແໜ້ນແຟ້ນຈະເລີນງອກງາມຍິ່ງໆຂຶ້ນ, ຕະຫຼອດໄລຍະທີ່ຜ່ານມາກະຊວງປ້ອງກັນປະເທດ ແຫ່ງ ສ ຣັດເຊຍ ທີ່ໄດ້ໃຫ້ການ ຊ່ວຍເຫຼືອອັນລ້ຳຄ່າແກ່ ສປປ ລາວ ກໍຄືກອງທັບປະຊາຊົນລາວໃນຫຼາຍດ້ານ ເປັນຕົ້ນແມ່ນການກໍ່ສ້າງພະນັກງານ-ນັກຮົບຂະແໜງການຕ່າງໆ ລວມທັງສະ ໜັບສະໜູນຊ່ວຍເຫຼືອ ສປປ ລາວ ໃນທຸກດ້ານເຊັ່ນ: ດ້ານການເມືອງ, ເສດຖະກິດ, ການສຶກສາ, ສາທາລະນະສຸກ, ວິທະຍາສາດເຕັກໂນໂລຊີ, ການປ້ອງ ກັນຊາດ, ປ້ອງກັນຄວາມສະຫງົບ ແລະ ດ້ານອື່ນໆ. ສະເພາະດ້ານວຽກງານປ້ອງກັນຊາດກອງທັບ ຣັດເຊຍ ໄດ້ມີການພົວພັນສະໜິດແໜ້ນນຳກັນມາແຕ່ ດົນນານ ແລະ ໃນປັດຈຸບັນຍິ່ງກ້າວເຂົ້າສູ່ລວງເລິກ ແລະ ເປັນຮູບປະທຳຫຼາຍຂຶ້ນ ສະແດງອອກນອກຈາກການຮ່ວມມືທາງດ້ານການແລກປ່ຽນຄະນະຜູ້ ແທນຂັ້ນສູງຂອງສອງກອງທັບນຳກັນເປັນປະຈຳປີແລ້ວ ກໍຍັງໄດ້ມີການພົວພັນທາງດ້ານການກໍ່ສ້າງບຸກຄະລາກອນ, ການຊ້ອມຮົບຮ່ວມກັນການຊ່ວຍເຫຼືອ ດ້ານເຕັກນິກການທະຫານ, ການຊ່ວຍເຫຼືອດ້ານມະນຸດສະທຳ ແລະ ການສະໜອງອຸປະກອນເຕັກນິກການທະຫານສອງກະຊວງປ້ອງກັນປະເທດ ລາວ-ຣັດ ເຊຍ ໄດ້ມີສັນຍາຮ່ວມກັນຫຼາຍລະດັບ ທັງຂັ້ນລັດຖະບານ, ກະຊວງປ້ອງກັນປະເທດ ທັງນີ້, ກໍເພື່ອແນໃສ່ຮັດແໜ້ນສາຍພົວພັນຮ່ວມມືຊ່ວຍເຫຼືອເຊິ່ງກັນ ແລະ ກັນ ລະຫວ່າງສອງລັດຖະບານ, ກະຊວງປ້ອງກັນປະເທດ ລາວ-ຣັດເຊຍ ອັນເປັນການຍົກລະດັບຄວາມສາມາດຂອງກອງທັບປະຊາຊົນລາວ ໃນການ ປົກປັກຮັກສາຜືນແຜ່ນອັນຄົບຖ້ວນຂອງຊາດໄວ້ໃຫ້ໝັ້ນຄົງ.
ສະຫາຍ ພົນໂທ ວໍລາດີເມຍ ຊາຣຸດນິສະກີ ໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ສະໜິດສະໜົມ ທີ່ເຕັມໄປດ້ວຍໄມຕີຈິດ ມິດຕະພາບ ແລະ ຄຳເວົ້າອັນຈົບງາມຂອງລັດຖະມົນຕີກຊວງປ້ອງກັນປະເທດ ໃນຄັ້ງນີ້ ພ້ອມດຽວກັນນີ້, ຍັງໄດ້ແຈ້ງຜົນຂອງການພົບປະສອງຝ່າຍຮ່ວມ ກັບ ສະຫາຍ ພົນຕີ ຄຳຫຼ້າ ພັນໄຊຍະສຸກ ຫົວໜ້າການເມືອງວິທະຍາຄານປ້ອງກັນຊາດ ໄກສອນ ພົມວິຫານ ໃຫ້ລັດຖະມົນຕີກະຊວງປ້ອງກັນປະເທດ ໄດ້ ຮັບຊາບ, ເຊິ່ງທັງສອງວິທະຍາຄານຈະສືບຕໍ່ພົວພັນຮ່ວມມືຮອບດ້ານ, ໂດຍໄດ້ຮ່ວມກັນລົງນາມບັນທຶກຄວາມເຂົ້າໃຈ. ທີ່ຜ່ານມາວິທະຍາຄານເສນາທິ ການກອງທັບ ຣັດເຊຍ ໄດ້ມີການເຝິກອົບຮົມນັກສຶກສາລາວຫຼາຍຄົນຢູ່ໃນສະຖາບັນການສຶກສາຕ່າງໆ, ເຊິ່ງບັນດານັກສຶກສາເຫຼົ່ານັ້ນປັດຈຸບັນໄດ້ເຮັດໜ້າ ທີ່ປົກປັກຮັກສາ ແລະ ສ້າງສາພັດທະນາປະເທດຊາດລາວຢ່າງມີຜົນສຳເລັດສູງ.
ແຫຼ່ງທີ່ມາ: ຈັນທະວົງ
ວັນທີ 15/12/2022