ປະກາດການເລື່ອນຊັ້ນ ພັນຕີ ຂຶ້ນ ພັນໂທໃຫ້ນາຍ
ທະຫານບັນດາກົມກອງເຂດໃຈກາງ

   ພິທີປະກາດການເລື່ອນຊັ້ນ ພັນຕີ ຂຶ້ນ ພັນໂທ ໃຫ້ນາຍທະຫານຢູ່ບັນດາກົມກອງ ເຂດໃຈກາງ 1 ໄດ້ຈັດຂຶ້ນໃນ ວັນທີ 28 ມີນາ 2023 ນີ້, ທີ່ສະໂມ ສອນກົມໃຫຍ່ການເມືອງກອງທັບ, ໂດຍການເປັນ ປະທານຂອງ ສະຫາຍ ພົນໂທ ທອງລອຍ ສິລິວົງ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າ ກົມໃຫຍ່ການເມືອງກອງທັບ, ມີຄະນະກົມໃຫຍ່ເສນາທິການກອງທັບ, ຫ້ອງວ່າການກະຊວງປ້ອງກັນປະເທດ ແລະ ຄະນະພັກ-ຄະນະ ບັນຊາກົມກອງທີ່ກ່ຽວ ຂ້ອງເຂົ້າຮ່ວມ.

   ສະຫາຍ ພົນຈັດຕະວາ ສີທາ ດວງມາລາ ຫົວໜ້າກົມພະນັກງານ ກົມໃຫຍ່ການເມືອງກອງທັບ ໄດ້ຜ່ານຂໍ້ຕົກລົງຂອງ ກະຊວງປ້ອງກັນປະເທດ ວ່າດ້ວຍ ການເລື່ອນຊັ້ນ-ເລື່ອນທຽບຊັ້ນ ໃຫ້ນາຍທະຫານ ຢູ່ບັນດາກົມກອງກຳລັງຫຼວງ-ກຳລັງທ້ອງຖິ່ນ ເຂດໃຈກາງ 1, ອີງຕາມກົດໝາຍນາຍທະຫານກອງທັບປະ ຊາຊົນລາວ (ສະບັບປັບປຸງ) ໃນພາກ ທີ II ໝວດ ທີ 3 ມາດຕາ 22 ແລະ 23 ວ່າດ້ວຍ ການເລື່ອນຊັ້ນໃຫ້ນາຍທະຫານ, ກະຊວງປ້ອງກັນປະເທດຕົກລົງ ເລື່ອນຊັ້ນນາຍທະຫານຈາກຊັ້ນ ພັນຕີ ຂຶ້ນ ພັນໂທ ຈຳນວນ 159 ສະຫາຍ.

   ໂອກາດດັ່ງກ່າວ, ສະຫາຍ ພົນໂທ ທອງລອຍ ສິລິວົງ ໄດ້ມີຄຳເຫັນໂອ້ລົມ ແລະ ໃຫ້ທິດຊີ້ນຳ ຫຼາຍບັນຫາສຳຄັນຕໍ່ນາຍທະຫານ ທີ່ໄດ້ຮັບການເລື່ອນຊັ້ນ ໃໝ່ໃນຄັ້ງນີ້, ພ້ອມທັງເນັ້ນໜັກໃຫ້ແຕ່ລະສະຫາຍ ສືບຕໍ່ເຝິກຝົນຫຼໍ່ຫຼອມຕົນເອງຮອບດ້ານ, ພ້ອມກັນຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງ ຕົນຢ່າງເປັນເຈົ້າການ, ເປັນຫຼັກແຫຼ່ງໃນການເຕົ້າໂຮມຄວາມສາມັກຄີພາຍໃນໃຫ້ເປັນປຶກແຜ່ນແໜ້ນໜາ, ປັບປຸງແບບແຜນວິທີເຮັດວຽກໃຫ້ຮັດກຸມ, ບັນ ຫາສຳຄັນພື້ນຖານຕ້ອງປະຕິບັດຕາມຫຼັກການລວມສູນປະຊາທິປະໄຕເຮັດວຽກເປັນໝູ່ຄະນະ, ແບ່ງໃຫ້ບຸກຄົນຮັບຜິດຊອບ, ແບບແຜນການເຮັດວຽກຕ້ອງ ມີຂັ້ນຕອນ, ມີຈຸດສຸມ ແລະ ພ້ອມກັນເຮັດສຳເລັດໜ້າທີ່ການເມືອງທີ່ການຈັດຕັ້ງຂັ້ນເທິງມອບໝາຍໃຫ້.

ແຫຼ່ງທີ່ມາ:ນາງ ນາລີ ທະວີພອນ
ວັນທີ 29/03/2023