ຮອງລັດຖະມົນຕີກະຊວງປ້ອງກັນປະເທດ ເຄື່ອນໄຫວເຮັດວຽກຢູ່ ສປ ຈີນ
ຄະນະຜູ້ແທນການທະຫານຂັ້ນສູງກະຊວງປ້ອງກັນປະເທດ ແຫ່ງ ສປປ ລາວ
ໄດ້ເດີນທາງໄປພົບປະເຮັດວຽກກັບຜູ້ບັນຊາການທະຫານເຂດສູ້ຮົບພາກ
ໃຕ້, ກອງທັບປົດປ່ອຍປະຊາຊົນຈີນ ຄັ້ງທີ 3, ໃນລະຫວ່າງວັນທີ 27-30 ພະຈິກ 2022 ນີ້.
ກ່ອນເຂົ້າກອງປະຊຸມພົບປະສອງຝ່າຍ ສະຫາຍ ພົນໂທ ຄຳລຽງ ອຸທະໄກສອນ ກຳມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ຫົວ ໜ້າກົມໃຫຍ່ເສນາທິການກອງທັບປະຊາຊົນລາວ, ຍັງໄດ້ຮັບຟັງການລາຍງານສະພາບຫຼັກໝາຍຊາຍແດນ ຫຼັກທີ 29 ໂດຍຫຍໍ້ ຈາກຫົວໜ້າກອງຮ້ອຍທະ ຫານຊາຍແດນ 315 ກອງທັບປົດປ່ອຍປະຊາຊົນຈີນ ແລະ ທັງສອງຝ່າຍຍັງໄດ້ທາສີແດງໃສ່ຕົວໜັງສືຢູ່ໃນຫຼັກໝາຍ, ຄະນະທັງສອງຝ່າຍໄດ້ເດີນທາງໄປ ກອງຮ້ອຍທະຫານຊາຍແດນເບື້ອງຈີນ ພ້ອມທັງທ່ຽວຊົມການປະກອບຂອງກອງຮ້ອຍທະຫານຊາຍແດນ ແລະ ປູກຕົ້ນໄມ້ມິດຕະພາບຮ່ວມກັນ. ຫຼັງຈາກ ນັ້ນຄະນະທັງສອງຝ່າຍໄດ້ເດີນທາງໄປຍັງໂຮງແຮມ ຈີງຫຼານ ຢູ່ເມືອງຫຼ້າ ສປ ຈີນ ເພື່ອເຂົ້າຮ່ວມກອງປະຊຸມພົບປະສອງຝ່າຍ, ຝ່າຍລາວນຳຄະນະໂດຍ ສະ ຫາຍ ພົນໂທ ຄຳລຽງ ອຸທະໄກສອນ ພ້ອມຄະນະ, ຝ່າຍຈີນນຳຄະນະໂດຍ ສະຫາຍ ພົນເອກ ຫວາງສິ້ວປິນ ຜູ້ບັນຊາການທະຫານເຂດສູ້ຮົບພາກໃຕ້, ກອງ ທັບປັດປ່ອຍປະຊາຊົນຈີນ ພ້ອມຄະນະ. ກ່ອນອື່ນສະຫາຍ ພົນເອກ ຫວາງສິ້ວປິນ ໄດ້ກ່າວສະແດງຄວາມຍີນດີຕ້ອນຮັບຢ່າງອົບອຸ່ນ ແລະ ເປັນກັນເອງ ພ້ອມທັງແນະນຳຄະນະຜູ້ແທນຝ່າຍຈີນໃຫ້ຝ່າຍລາວໄດ້ຮັບຊາບຕື່ມອີກ.
ໂອກາດນີ້ ສະຫາຍ ພົນໂທ ຄຳລຽງ ອຸທະໄກສອນ ກໍໄດ້ສະແດງຄວາມຂອບໃຈເປັນຢ່າງສູງຕໍ່ຝ່າຍຈີນທີ່ໃຫ້ການຕ້ອນເປັນຢ່າງດີ, ມີບັນຍາກາດແຫ່ງ ຄວາມສາມັກຄີຮັກແພງອັນສະໜິດສະໜົມ, ອົບອຸ່ນ, ໄມຕີຈິດມິດຕະພາບອັນດູດດື່ມຖານສະຫາຍອ້າຍນ້ອງບ້ານໃກ້ເຮືອນຄຽງທີ່ດີນຳກັນຕະຫຼອດມາ, ພ້ອມທັງແນະນຳຄະນະຜູ້ແທນຝ່າຍລາວໃຫ້ຝ່າຍຈີນໄດ້ຮັບຊາບ. ທັງສອງຝ່າຍໄດ້ຕີລາຄາສູງການພົບປະໃນຄັ້ງນີ້ ໂດຍສະເພາະແມ່ນການຮ່ວມມືລະຫວ່າງ ສອງກອງທັບ ລາວ-ຈີນ, ກໍຄືກົມໃຫຍ່ເສນາທິການກອງທັບປະຊາຊົນລາວ ກັບ ຜູ້ບັນຊາການທະຫານເຂດສູ້ຮົບພາກໃຕ້ ກອງທັບປົດປ່ອຍປະຊາຊົນຈີນ ໄດ້ຮັບການເພ່ີມທະວີຂຶ້ນຢ່າງບໍ່ຢຸດຢັ້ງເຂົ້າສູ່ລວງເລີກ, ເປັນຕົ້ນແມ່ນໄດ້ແລກປ່ຽນຄະນະຜູ້ແທນຂັ້ນຕ່າງໆ ນັບແຕ່ສູນກາງລົງຮອດທ້ອງຖີ່ນ, ໄປມາຫາສູ່ ຢ້ຽມຢາມເຊິ່ງກັນ ແລະ ກັນ, ພົວພັນຮ່ວມມືຊ່ວຍເຫຼືອເຊິ່ງກັນ ແລະ ກັນໃນດ້ານຕ່າງໆ ການຮ່ວມມືດ້ານການຄ້າ ແລະ ການລົງທຶນໃນທຸກຂະແໜງການ ເສດຖະກິດວັດທະນະທຳ-ສັງຄົມ ແລະ ໃນຂົງເຂດວຽກງານການເມືອງ ແລະ ຄວາມໜັ້ນຄົງ, ໄປຄຽງຄູ່ກັນນັ້ນ ການພົວພັນຮ່ວມມືໃນຂົງເຂດວຽກງານ ປ້ອງກັນຊາດ, ກໍ່ນັບມື້ນັບຂະຫຍາຍຕົວຢ່າງຕໍ່ເນື່ອງ, ສິ່ງທີ່ພົ້ນເດັ່ນ ແມ່ນການຮ່ວມມືທາງດ້ານເຕັກນິກການທະຫານ, ການກໍ່ສ້າງ-ບຳລຸງຍົກລະດັບໃຫ້ ນາຍ ແລະ ພົນທະຫານ ຂະແໜງການຕ່າງໆຂອງກອງທັບປະຊາຊົນລາວ ແລະ ການຮ່ວມມືໃນການຮັກສາຄວາມສະຫງົບຮຽບຮ້ອຍຕາມບໍລິເວນຊາຍແດນ ເຮັດໃຫ້ຊາຍແດນຂອງສອງປະເທດເປັນຊາຍແດນແຫ່ງສັນຕິພາບ, ມິດຕະພາບ ແລະ ການພັດທະນາ, ເຮັດໃຫ້ຊິວິດຂອງປະຊາຊົນສອງຊາດ ລາວ-ຈີນ ຢູ່ ຕາມບໍລິເວນຊາຍແດນໄດ້ຮັບການປັບປຸງນັບມື້ດີຂຶ້ນ.
ແຫຼ່ງທີ່ມາ: ໜັງສືພິມກອງທັບ
ວັນທີ 30/11/2022